विगत किछु समयसं मैथिली सिनेमाक विकासक लेल किछु
सजग नवतुरिया आगू आबि रहल अछि। हुनका लोकनिमे अपन भाषा, संस्कृति, कला आदिक
प्रति अशेष सम्मान आ असीम प्रेम बुझना जायछ। आई प्रत्येक क्षेत्रमे मैथिल युवा
वर्ग किछु ने किछु क’ रहल छैथ अपन मातॄभाषा आ मात्रृभूमिक लेल । एहने किछु मैथिल युवजन एकटा मैथिली फ़िल्म ल’ क’ आबि रहल छैथ जकर नाम अछि “ प्रेम प्रतिज्ञा” ।
अपन मिथिला फ़िल्म प्रोडक्शनक बैनरके अधीन बनल “ प्रेम प्रतिज्ञा” मिथिलावासी के अपन घर-आंगन,
संस्कृति आ दर्शकक मांगक धेयानमें रखैत
विशेष चहटगर गीत, मधुर संगीत, हंसी मजाक, एक्शनसं भरपूर फ़िल्म अछि। फ़िल्मक
निर्माता छैथ निर्माता- ओम शंकर राज आ दीपक चौधरी । युवा निर्देशक चंदन मिश्रा जी
द्वारा निर्देशित एहि फ़िल्मक कथा पटकथा आ गीत लिखने छथि दीपक दीवाना आ अनर्जित
शर्मा। सुन्नर संगीत देने छैथ शिव मनमोही। फ़िल्मक गीतके अपन मधुर स्वर देने छैथ
विकास झा, देवानन्द झा, साक्षी, राधा पाण्डेय, रंजना झा ।
लगभग एक सौ बेसी एलबम कए चुकल लहेरियासरायक हरिपट्टीक निवासी दीपक दीवाना मुख्य नायक आ
पूजा कौशिक मुख्य नायिका छैथ । नवोदित कलाकार में ओमशंकर राज आ पलक। सह कलाकार छैथ
गुज्जर रंगीला, ज्ञानी रावत, हीरा देवी, चंदन राय, संजय भंडारी, आ कोमल मिश्रा
।
फ़िल्मक कथा ओहन व्यक्ति के सजग क’ रहल अछि जे
बेटाक मोह में आबि बेटा बेटीमे अन्तर क’ बेटी पर घोर अत्याचार, बालिका पर उत्पीड़न
करैत छैथ । फ़िल्मक शूटिंग मिथिलाक प्रमुख स्थल पर भेल अछि जाहिमे दरभंगा, मधुबनी
सहित मुजफ़्फ़रपुर, वैशाली, राजगीर आदि महत्वपूर्ण स्थानक नाम अछि ।
फ़िल्मक विषय-वस्तु, गीत संगीत, प्रभावी अभिनय
आदिकए देखैत ई फ़िल्म निश्चित रुपेन मिथिलाक दर्शकक बीच अपन लोकप्रियता हासिल करत।
फ़िल्मक अपार सफ़लताकए लेल शुभकामना दैत मिथिला सिनेप्रेमीसं आग्रह जे ओ ई फ़िल्म
अवश्य देखैथ।
No comments:
Post a Comment